My Birthday Cake Birth ~

 

今日都仲係好嬲，個心好唔舒服，好擔心，好激氣。
本身一早起整蛋糕，不過冇心情，喊左幾次，同肥傑一路傾一路傾，舒服多了。
肥傑份人比較開通，又識得放鬆，總係特別明白應該點去勸導一個青少年。

＊ 要置身處地去明白同感受對方既感受和處境。

＊ 唔好用現實既理據去同對方討論，因為青春期既少年係會特別反感。

＊ 千祈唔好踐踏到對方的一切，無論自尊同佢相信緊既事，因為每個人都有好勝同防衛之心，如果萬一傷害到對方，或者講左d難聽既說話，對方就會更努力去證明自己同保護自己。

等等…

明白左呢D野之後，我總算叫做釋懷了不少。

知道香港近排好似好興無厘頭既「荃加福祿壽」，於是上Youtube搵黎睇。
哈哈哈哈！搞笑得黎又點諷刺唔同階層既野！無厘頭唔會中傷人，低B好笑。
呢D處境Show好接近大家既生活，講既野幾乎人人都知。


就係咁，睇完呢一大堆野之後，我開心番好多。
調整番心情，開開心心咁去整蛋糕。

~ 。 ~ 。 ~ 。 ~ 。 ~ 。 ~ 。 ~ 。 ~ 。 ~ 。 ~ 。 ~ 。 ~ 。 ~ 。 ~ 。 ~

 

提早一日整蛋糕比自己，因為好驚整得唔好。

呢個蛋糕係同Ricky一齊設計架！由下午3點半整到半夜1點，終於順利出世啦！
好開心，亦都好傻地，好驚好驚個蛋糕訓醒教會唔同左樣，所以咋咋臨影相。
今日終於踏出左成功蛋糕既第一小步，有少少感動 >_____<

我影低左生日蛋糕出生既過程 ~

全靠肥傑呢把刀，先可以將個蛋糕切到咁靚咋 ~

第一次抆Cream，手勢都唔差架。^^"

我既蛋糕工具話缺唔缺，話齊又唔叫齊得晒。
係確保左自己對整野既熱誠唔係三分鐘熱度後，先開始去置工具。
我好慳錢，每樣每樣都係都非常有需要，先去上海街搵平貨。
抆刀同轉盆，再慢慢添置。

而且唔可以成為一個要果樣有果樣既人，咁會好快就變得唔識得珍惜的。
金錢要好好計劃、分配同投資。富豪一樣，小康一樣，窮人亦一樣。



臨時創造既「轉盤」，雖然轉得唔順，但都叫做一個辦法丫。

飯煲蒸架邊一共有四個凸，所以抆出黎既蛋糕邊有瑕癖。

設計草圖。

咁就放好左個花啦 ~
見唔見蛋糕右下凹左，係林煒傑先生「可愛」又「敏捷」既手指公的。

Daphne 既蛋糕呀 ~ 不過唔放字清好多 ~

 

                                                                                                                         麗

傷心。失望！

今日，二十歲生日前夕，我得知到一個從香港黎既消息。
一個我最緊張、最關心、對我最重要既人呃我。

成件事發生係一個月前
一個月前我已經心知不妙，突然有一股直覺話比我知，
事情一D都唔簡單。當時我真係好嬲，好緊張。
但我仍然努力保持理智同冷靜，好好傾談，給予意見。
當時我心情難受得很，肥傑好好安慰我，教我點處理。
其實果個時候，我已經作左最壞既打算。
但我真係唔想事情發生。

有幾多次，有幾多次我都將衝動壓落黎！

比足自由，信任，一個月之後，竟然發現佢呃我。
我最重要既人，咁多年黎，我點樣同你講架！？
我話無論點都好，都一定要坦白！我地點可以瞞住對方架！
何況我咁樣對你！我從來冇鬧過你，冇迫過你！
咁多年黎我錫你！放最多心機落你度！教育你、鼓勵你！
你知唔知你對我有幾重要呀？
就算我方法用得唔岩，第二日我已經立即向你道歉，改番。
我只係想你好！從來一點私心都冇！
我可以對天發誓，我絕對冇將我想要既強加落你度或者要你去做。

你有顧及我背後為你付出既野咩？
我咁樣黎信任你，但你呃我！
呢個行為完全傷透我個心！我對你好失望！好心痛！
無論無論點都好，唔可以先斬後奏！
事情根本已經唔係在意於有冇發生果件事，
而係在意於你呃左我！你傷害左我、枉費左我對你一直以黎既信任！
一直以黎既心機、照顧、愛！
點解我唔係你身邊你會變到咁，變到收埋自己既野？

我以最寬鬆既態度去面度，就係怕你唔講！
咁耐以黎我最怕既唔係怕你做左果件事，而係怕你先斬後奏！

估唔到呢段日子以黎，你每日都講住大話！
好可恥呀！

你傷害左一個人對你既信任呀！你傷害左我既心！




原來比人呃既感覺係咁，原來比人傷害左信任既感覺係咁…
爸…我依加明白你一直既痛了



                                                                                                          麗

肥矮紙包蛋糕 ~

$2 HKD 一個既紙包蛋糕，幾乎係每個小朋友細細個放學既下午茶回憶。
就咁去屋村普通既麵包店度買，生活簡單撲素。

我記得細細個好鐘意佢軟綿綿用手撕出黎食既感覺。

不過自己整冇果隻模，只可以用Muffin模取代。
全部都肥肥矮矮呀 ~

暴露下佢既身高先。哇！

以後又多一個早餐 or High Tea lu ~

 

                                                                                                                     麗

芝士磨菇雞肉 & 芝士洋蔥煙肉焗小法包

^^ 又係d好易整既野食。
買左兩條小法包，一日就到期。
諗起諗去，突然醒起可以焗小法包。
好在我平時買送咩都有，雪櫃貨源充足，琴日仲貪得意買左幾粒磨菇
磨菇同雞肉一齊最好食架啦 ~


剩左既菇夜晚仲用左黎整 "牛油炒巨菌"
其實就姐係就咁用Salt Butter炒香佢。好正架 ~



                                                                                                                       麗

某夜。

 

今夜，我們吃完晚飯後，手拉手出去屋外散步。
夜幕低垂，雖然雲多，但月亮非常晈潔明亮，星星依舊閃爍。
每次抬頭望到澳洲的星空，總禁不住讚歎它的美。
為何這兒的繁星和月亮會那麼亮？為何天空可以那麼廣闊？

我們住的剛好是一條新月形街道，可以繞著房屋走一圈，
到處花草樹木，寧靜寫意。
不經意的，突然感覺到，我倆像極一對老夫妻。
唯一的分別是，我們正是奮鬥的開始呢。

聊著聊著，又談到了我們不曾厭倦的話題，就是「將來」。
「將來」包括事業、居留權、金錢、買車、租屋、買屋、結婚、生小孩…
很早以前開始我們就密密計劃著，而很多大小計劃也完成了或是已實行中。
我們知道現實並不會完全跟著計劃走，就算跟著計劃走也會變得沉悶乏味，
但我們還是會計劃，因為我們都有著鮮明的目標。
就一步一步的，一步一步的去實現目標，去追求我倆想要的。

快到家門口，正當我說「今夜真好，我們以後也像這夜出來散步吧」的時候，
戲劇性的突然聽到凶湧細密的沙沙聲，那一刻立刻抱著頭大叫：「傑！跑呀！」
雨水嘩嘩的肆意降下，我們一邊狂奔，一邊快樂的大笑著。
寧靜的一夜，就這樣「浪漫地」結束了。

。

。

。

你最近有了一個新目標新挑戰，儘管我不太敢於嘗試這方面的事幹，
但我還是會百份百的支持你。不論成功與否。絕對！信任！
我就是欣賞你觀點獨到，又敢於冒險。




                                                                                                              麗

 

超級牛肉漢堡 伴薯條！

正呀！又慳時間又易整又好食，果然係快餐！
外國呢度好興食Fish & Chips，到處都可以見到呢D鋪頭，
加上麥當勞、Hungry Jack、Subway、Lord of the Fries到處林立，
每次我地趕時間或者想食香口野時，都會幫趁佢地。

Fish & Chips 既 Burger 同 Subway 我地呢幾個月都食唔少 ~
Fresh Salad, Tomatos and Onions真係無得頂！
食得多就自然知道材料要點配，知道要落咩醬。




呢個係最基本普遍既食法 ~ 今次我既材料有：
全麥包、生菜、蕃茄、紅洋蔥、Mozzarella Cheese 同 Angus Beef 安格斯牛肉。

你可以落青椒，紅蘿蔔絲等等。
之後我再整，落左片煙肉，更加香口好食 ~

材料放好晒之後唧上自已鐘意既醬，因為我得茄汁，所以就直接用茄汁。
而外國人有好多醬汁揀，較普遍既而我又鐘意既有
Sweet Chilli, BBQ Sauce, Thousand Island, Sweet Onions …


煎個薯條然後灑D Pepper。搞點 ~

食呢個包真係張到個口好痛，肥傑仲話要double Meat！
咁大個包，點食呀。

隻手指尾真係好『可愛』，成條又肥又短既蟲仔咁 

                                                                                                              麗

生日禮物之新刀提早開封 + 是日晚餐 ~

成日都話冇面包刀用，去左好多地方睇又覺得貴買唔落手。
哈哈，今晚面整蒜蓉包時，肥傑突然間變把刀出黎送比我。
好開心呀！哈哈！你又送D咁既類型既禮物比我啦！
仲要靜靜雞收埋左咁多日，想三十號果日送比我。
好野！以後我切蛋糕就方面好多啦！
嗯~ 我將來既成功好可能就係在乎你當初買左個電子磅同面包刀比我。
因為咁係叫做一種溫暖既支持同鼓勵 ~

不過其實，第一個送磅比我唔係傑呀。
係家敏呀！妹妹 ~ 你記唔記得最初時你去惠康買野，
咁岩見到百德通粉送迷你磅仔，你就買左番黎送比我。
當時我見到好開心，半年黎都靠住呢個磅仔去整野食呢 ~



雖然只係K-Mart的一把AUD14蚊既刀，但係你既細心令到我好開心 ~
而且把刀仲有十年既保養tim架 ~

當晚既晚餐，洋蔥炒黑椒雞柳、西芹腰果炒雞丁、蒜蓉包。
自已炒送好正架，可以落好多腰果！

不過呢，幫手切蒜蓉果個人，唔記得拎走蒜蓉心，搞到成個包青綠色呀！

                                                                                                                   麗

港式咖哩角 ~

好衰好衰！唔知點解D字upload左上blog就會變成咁。


用春卷皮包成小小既三角形，入面係咖哩牛肉餡，半煎炸後變得香脆可口。
油份很多。但做不回中一吃過的那份味道和感覺

以前中一學校小賣部的咖哩角，一元一小件。
第一個小息時總是興奮地跟好朋友天樂跑到擠迫的小賣部
拿著木籤一串就串五件新鮮香脆的咖哩角，滿足地吃著。

當時的我，英文名字叫Kelly Kwok，中文叫家麗，諧音像「咖哩」
因此都笑說自己是咖哩角。
有時候還會吃珍珠雞、龍鬚、迷你春卷和壽司。

對！珍珠雞也是我當年最愛之一。
小息前十分鐘，那一盆剛蒸好的珍珠雞香氣撲鼻。
從地下快速地傳到整層一樓也嗅得到，教在寂靜課室的我更覺饑腸轆轆。
鐘聲一響，各層同學也會奔到小賣部，一人一隻珍珠雞是也！

那段日子好簡單，好快樂。小賣部的阿姐親切得很。
可惜在中二還是中三那年，小賣部就換了做「維他公司」
咖哩角、春卷和龍鬚沒了…
珍珠雞、燒賣、手卷都非常難吃！
而且阿姐態度極差，沒禮貌之餘又常常只顧聊天！哼！

                                                                                                                 麗

蜜蜜焗蜜糖雞翼 ~

仲記得一個月前試整過一次，麻麻地。


今次好好心機咁醃呀焗呀，成功了 ~
醃左3-4個鐘，然後放鐵架兩面都分別焗兩個字。
掃左3次蜜糖，底1次，面兩次，每次掃完高溫焗3-5分鐘。

                                                                                                                 麗

1st TRY。New York Cheese Cake

點解打1st TRY，因為將會有2nd TRY…

紐約芝士餅原來都好易整，不過焗得個外面靚唔靚，就真係幾講技巧。
蛋糕出爐果半個鐘都好高，但放涼之後中間果Part比正常Cake下塌得多。
我覺得下塌半cm係最靚的，依加影既相都係就住角度咁影。

仲有，最大既問題係餅邊焗出黎太黑！NoNoNo！
再試。



味道方面
真係非常之喜歡。香濃幼滑既Cream Cheese啖啖散發住檸檬既清香
再配上酸酸甜甜既Sour Cream真係絕頂！
我地再飽再怕肥都好快消滅左成個Cake。

New York Cheese Cake
好邪惡呀你 ~

                                                                                                             麗



唔知點解加左字既相up左上黎之後出晒雜訊，所以今次呢3張相冇加水印。