24 to 30 - 12-20112011年既聖誕節，我地一齊脫離城市既繁囂，坐高鐵黎到湖北既鄉郊探望差唔多八十七歲既公公。
轉轉又折折，幾經辛苦，我地到達武漢後，又多重障礙下終於上到一架價錢合理既的士，
而最令大家難忘既就係我媽媽
好鐵定咁對司機講出的目的地地名分別係：高家河/高家橋/烏家橋 。
當晚零下2℃，我地係車入面已經好凍，車窗係結成霜，周圍都烏燈黑火，又荒又靜，
仲要係車程已經過左1個幾鐘之後先話搵唔到呢個地方，而我媽媽又繼續肯定佢既地點名！
真係嚇死我地！好彩~ 最後我地都順利到達，而果個地方名呢，就係叫做
「高河橋」！！記住啦！
一落車見到七年冇見既六十幾歲既大姨媽係黑暗既寒風中等待我地，真係好感動。
好記得當時既我重感冒，頭幾晚過住零度以下既生活真係好難受，每日24小時都帶住冷帽。
真正鄉下生活，只有一個暖爐係廳既枱底度可以間唔中暖腳，
只可以每幾日沖一次涼洗一次頭，仲要係用膠筒裝住滴出黎既熱水黎沖。
係室內裡面個口會噴好多煙，去洗手間更加唔洗講，
真係咁大個女第一次見到自己既便便係滾熱辣咁出煙！
深深體會到新鮮既感覺，事後我用左15分鐘細心欣賞 (呢句講笑)。
呢十日以黎除左訓教外，就算著晒帶黎既所有衫，真係凍到幾乎係冇一刻係暖過。
永遠都係會記得剛訓落去時被褥如同冰咁凍咁既感覺，
所有死物都係冰，潤唇膏要好大力先擠到出黎。
對於生活慣南方天氣既我地，寒冷既日子真係過得非常之難忘。
不過亦無減我地對鄉下既生活既樂趣，鄉下既生活真係好悠閑好清靜，
當地人又比較純樸簡單，呢十日心靈上舒服左唔少。
第二日起身坐鐵皮車仔出金牛鎮買下菜同日用品。
金牛鎮
回家後，第一次見到公公係廚房入面煮飯既身影。
5日黎一日三餐，公公都會親手煮熱辣辣既飯菜比我地食，感覺好難以形容，
我只可以話我好鐘意佢煮既每一道菜，每一道菜我都覺得係全世界最好味，最溫暖。
見到年邁既公公手腳比起上年係廣州既佢緩慢了，
到底係穿衣太厚，令動作係寒冬下緩慢下來，定係時光既流逝令到公公不再靈活呢…
我仍然好欣賞佢炒菜既身影。
飯廳窗外景致
我地每日食到既新鮮飯送！
真係非常之鮮甜，完全同城市既冇得比！
第一個早上開飯畫面
公公發現鏡頭，但係並無理會，我反而有點尷尬呢。
某日早上我喜愛既番薯粥早餐 ~
家裡面一張有中國十大元帥既海報。
某日路上見到正開去鎮上既冰糖胡蘆車。
幾日無洗頭既相 ~ 相片完全反映唔到當時頭髮黏立程度。
好多時我地一洗完頭就會影相，冇洗頭就帶冷帽先影。
某個飯係既下午，肥傑就咁坐係度訓著左。
每日飯後或晚上我地都會有一個活動，就係下橡棋。
橡棋係我同肥傑專程出市鎮買的。亦係因為呢一副棋，將原本同肥傑關係陌生既公公拉近了，
將一個怕醜、唔敢主動同關係生疏既老人家相處既少年多左一個共同既興趣。
此時既公公，笑了。
展現左佢一個又開心又自然既笑容。
公公既腦筋係非常非常之靈活！
同佢捉橡棋真係好郁腦！每一步都係佢提點住先死唔去，可以繼續捉落去。
仲要讓我地一車一馬呢 ~
又有一D時候，我地會坐小椅子圍住暖爐傾下公公後生時既工作，
由佢細細個唔識字出黎打工，到長大後自己讀夜校讀書學字，之後做火車廚師時去過咩國家，
去到外國甚至會有翻譯跟身既威水史。
又會講下我細細個比媽咪打，佢當時係幾嬲媽咪，嬲到差D當眾想打佢。
公公既想法真係同上一代既人唔同，媽咪時時刻刻都話我蠢，
而呢個時候公公反而係會直接話佢既教法有問題。
真係唔明，媽咪細個時公公婆婆係冇打過佢，反而佢長大之後就會用令外一個方法黎對我。
呢個方法既創傷有幾大，我再清楚同深刻不過了，我依加仍然同細個發既誓一樣，
就係「一定唔會咁樣對番我將來既小朋友」，因為有一D傷口係好唔番的。
某一個早上，肥傑猜輸左要去洗碗 ~
大開心啦我 ~~ 唔洗掂到D冰水。
已經到左尾二呢日了。我其實好清楚公公既身體已經年紀大，不過我仍然要求食一餐公公包既餃子。
因為我心知呢個機會真係好寶貴好寶貴 ~ 希望將來我可以包比公公食，而佢又唔嫌我包得唔好食啦~
第一籠蒸出黎既餃子 ~~ 又鮮又甜，真係睇見都流口水！
|
餃子好快就會凍晒，大家都手快快趁熱食 ~
呢一餐真係食得好滿足呀 ~
第二朝就要走了，臨走時影合照。
呢一張係臨別既第一張相，每次睇到我既感受都好深刻。
因為好清楚好清楚見到公公眼神既不情願，
不情願望鏡頭，不情願直接面對離別，不情願做一些有離別意義既事…
當日上車後，我望見公公好快轉身走，獨自一個緩慢地過馬路。
在車上我一直哭一直哭，心臟好像給牽扯住一樣，從來都未有過止不住地流淚。
真係好唔捨得，更加唔想去想象一兩星期後一個獨居老人過落大雪既生活會係點樣。
公公比左我同妹妹每人一千元，我地實在收不下，
臨出門時偷偷放係公公既床頭，並加上小小既字條：
「親愛的公公，能吃到你煮的好菜，我都覺得好溫暖，好滿足！
你的心意我們心裡已經收到了，謝謝！希望你身體健康！
好好保重自己，我們有空會再來看你！不要說老了這不好那不好，
我覺得老了的公公好可愛，而且非常能幹，打從心底就佩服你！
不論是你煮菜或是下棋，都讓我覺得好厲害！
希望未來幾年我們可以賺了錢好好的孝敬你！ 麗麗敬上 」
「公公！這幾天能在你煮的食物中感受到你對我們的關心，
我也很開心可以親口吃到你的餃子，謝謝公公。
你所煮的東西全都很好味，希望將來有機會煮東西過你吃，
好好再孝敬你。希望公公生活開開心心，身體健康也重要的！
我喜歡公公！ 敏敏上」
「公公，很高興能與你下棋，令我獲益良多。
吃了你的菜也令我感到溫暖。希望你身體健康，生活愉快！
麗麗男友煒傑上」
一到達大姨媽屋企之後，我就立即叫媽咪打電話比公公，
話佢之放左錢係佢枱面度，因為我怕會唔見，當時媽咪比個電話我，
公公真係當時先發現我地冇收到D錢，我聽到公公一把顫抖著老人聲音說：
「麗麗呀……公公都沒甚麼給你…甚麼都沒有…」
我一如的安慰，說叫到你煮的好菜已經心滿意足。
掛線後，眼淚又忍不住掉下來了，佢當時既聲音實在太令我刻骨銘心了。
第一日到達後我入佢房間，不為意咁見到床頭枱上面，
放左一張用金色相框表得好靚既人頭照，
裡面帶住微笑既人，正正就係公公本人，並寫有八十七歲既字眼。
我好清楚影定呢D相係一件好平常既事，只不過見到時心裡面始終不太好受，心有點酸。
公公係一個非常之著重生活健康既人，每日作息定時，睡前用熱水暖腳，
偷偷係房間入面做運動先再訓教。食既野好新鮮好健康，每日都會打麻雀保持腦筋靈活。
以後我每個新年都只有一個願望，希望公公身體健康！長命百歲！
I only have one big wish in my future new years,
I wish that Grandpa stay in good
health and live for hundreds！
Please give me a chance to
love you！
麗
