真的是冬天嗎？

 

繁花開了，鳥兒在叫，蜜蜂在採花蜜
我在懷疑，這是冬天嗎？

是我強迫他帶上這朵掉在地上的花。^^"

我也要 ~

屋門前的小小小花。

Camberwell路邊的花 ~

水仙 ~

還有千年靈芝，哇哈哈哈！

 

                                                                                                         麗

 

Camberwell的美麗建築 ~

今日朝早，收到一個好好既消息，
唔開心左成晚既林小朋友開心到喉嚨緊晒，
連多謝都唔識講。

琴日跌左係電車上既銀包搵番了 ~

我地立即去Camberwell既電車總站 (類似維修站之類)
有一楝小小的舊式的Tram Office ~

傑就係係果度同佢既銀包重聚
所有原本要同佢say Goodbye既HKID Card, Cash, 3Bank Cards, Student Card etc.
全部回歸佢既懷抱，安心了 ~

然後我地周圍亂咁闖，去尋找美麗既建築。

呢楝唔知係教堂定紀念堂呢 ~
好似係紀念Victoria 既一個貢獻過的偉大女人。

我見識少，唔知道背後既意義，只看見建築好靚，好特別。

配上當天無敵的藍天。

另一則既style更討我喜歡，有少少Harry Potter既感覺 ~

拍了數張簡單清靜的合照，我們的三週年紀念就俏俏的記錄下來了。
留待將來成為一張經典，一張張窩在心頭的照片，一段段甜酸苦澀的回憶。

在這草地逗留了一段時間後，我地繼續走。
呢楝係Camberwell Hall。

經過充滿古老味道既警局。

看到了美麗純潔的冬景。

拔到了一間又平宜又親切的飯店。

只係$6AUD，有一大盒烤雞肉配炒飯伴沙嗲汁，好多好多肉 ~
見到我地兩個人，仲主動比多套叉同我地傾幾句 ~

好少會遇到呢種款待了，大多時見到你叫咁少野食，態度冷冰冰的。
我都明白兩個人叫一樣野唔係咁有禮貌，不過真係好貴呢  >___< "


呢兜有人情味既飯，食到我地兩個都好開心 ~

今天的日落紅暇。

夜晚我地去左Nando's試下。
除左雞雞牌幾得意之外，下次我可以整個更大更好味既自己倆個吃。

                                                                                                                    麗

 

第一日踩單車番學

7月21日
朝早8:15，肥傑幫我影左幾張相 ~
跟住好快就開始番學lu ~

全程大概45分鐘

呢次第一次番去，好累，全部都係上落斜，累到冇晒知覺。
因為上斜太博，所以左腳踩爆左一條血管，好痛好痛，
而右腳同一個位大撞三次，瘀到成3份2個手掌大，每行一步都痛。
兩隻小腿既血管明顯脹得好粗，青色大大條呢。
PatPat更加唔洗講，好痛丫！

本身一D都唔想停，想keep住每次番學都踩番去，
但係因為爆血管果個位痛得太勁，輕摸都痛，所以都係決定休息一日了。

點知到左第二朝起身，我唔甘心，堅持踩番學校，因為一定要習慣呀！
今次比自己休息兩次，每次3分鐘，上斜冇咁博。

然後就係到今日lu，7月30日
一共踩左五、六次，有兩日姐係星期五行路，
因為要番工，放工已經天黑，危險唔踩得。

情況係點呢？
因為我既堅持，肌肉已經開始適應了同變強壯，愈黎愈唔累，
好多時上斜時我都盡力，因為好自然就會問自己一句：你係咪咁渣斗呀？
轉彎、過窄位同路面不平全部都敏捷同穩定左好多，
特別係要繞路人，靈敏左好多。

不過琴日好恐怖呀，落果個大斜既時候，我較個鍊同車速唔好，
個Brake完全work唔到，因為太斜啦，好冇安全感呀，
到個地既凹凸位時，車速太快，快到好似電單車咁，
成個連人帶車飛一飛起，跟住著地再極衝，爭少少就頂唔到，
完全係拍緊咩亡命飛途，極速飛車，依加講起都驚驚。
果時好驚，不過係咁同自己講唔好驚，盡量定好個身，
平衡好，就唔會有事架啦，好似搾電單車咁咋嗎！

 

                                                                                                                麗

 

有甚麼痛會忘不了

         我忘記不了那天難受的感覺，刺痛著的胸口，崩緊的咽喉，忍著淚走出課室。冰冷的空氣冷卻了全身，小雨點肆意灑在淚流的臉上，空曠無人的停車場，忍不出哭了出來，把抑壓己久的一切都掏出來，想讓臉頰兩行溫暖的淚水帶走一切，帶走我的痛。


         有一些傷痛、有一些不快，你以為長大後會堅強，會忘記，但卻偏偏隨著你的知識及認知增長，傷口變得更清晰可見，更痛，更難忘… 縱使你處理得多妥當，那些痛還是會藏在內心深處的一個陰暗面，一面你不知道的軟弱，更摸不著何時會湧來。你以為愛情的溫暖可以彌補，你以為為自己將來的奮鬥去爭取自己想要的就可以清除，可是冰冷缺愛的感覺永存，孤獨的靈魂不時恐嚇著你。


         一直走，一直走，走到洗手間裡，躲進最裡面的一格，痛哭起來，此時所有感覺真的浮現出來了。


         這複雜又緊密的情感，教我又愛又痛，但這刻我很恨你，我真的恨你，我恨你在我身上留下的傷痕，我恨你帶給我的傷害，我恨你做過的一切，我恨你對我自小說過傷害我的說話，我恨你對我的影響！一切我都記得太清楚，太深刻，畫面仍歷歷在目，你怎樣叫我去死，小二那年因為買錯青瓜怎樣扯著我的頭髮來回撞在牆上，你粗言穢語的對待，在眾人面前那教人失去自尊的掌刮，記得我不覺得自己是人的那一段的日子，常常帶著瘀青的身軀、指甲血痕在臉上上學給老師和同學嘲笑責罵的日子，你們吵架時的恐懼、無奈、刀鋒及地上的血跡，你在我身上瘋狂發洩情緒那無聲的痛苦，你常把我夾在戰爭中拉扯，記得你把那事情怪在我頭上的那種透不了氣的壓抑，記得你對我瘋狂的鞭打，甚至邊打邊笑的笑聲… 你不許我哭，不許我叫，我哭你會辱罵我醜陋，我叫你會愈打愈起勁。你不讓我痊癒，每次我翌日已能笑臉再現，你會罵我臉皮厚，好了傷疤忘了痛，更會再說一些傷害我的說話，這使我開始迫自己多憂鬱幾天才敢回復，迫自己不要那麼快忘記痛楚。我甚至做到不哭不叫，記得人生中給你打得最利害那次，我只默默舉起雙手護著頭，緊閉雙眼強忍痛楚，一滴眼淚也沒流，連「鐵通地拖棍」也全凹，椅子打破，十隻手指全腫脹，手肘更腫得看上去像骨也彎了一樣，看見也心驚，全身無一幸免；記得人生中你把我們心傷得最痛的一次，家最難過的那一年，我沒哭過，因為你倆已每天情緒爆炸，我沒位置哭，沒資格哭，沒時間哭，也不敢哭，哭會成為一個弱點，你會找著這弱點肆意的傷害我。我恨你！你知不知道我真的很痛苦，你知不知道這一切都促使我今天的抑鬱，社交問題等等。以往有任何再大的事再大的傷心，一覺睡醒，對我來說是新的一天，現在對我來說，是惡夢的延續… 我很難走出這一切痛苦…我的路走得好辛苦呀。


         哭了一陣子，突然想起離開課室太久了，要回去追上進度，但我真係受不了，也沒心情上課，此時想起數天前妹妹轉告父親的說話，他說既然過了澳洲，就應該放下香港的一切，不要再想香港的事情了。此刻我頓時想通了，既然影響得了我那麼深，那麼久，我更不應該再讓這影響繼續下去，辛辛苦苦的來到澳洲，我不能辜負父親對我的付出，我應放下一切，課堂裡教授的，正正就是我該要學習的，等待著我去克服，去重新開始。雖然很不容易，我亦不知要該怎樣做，但我很想成為一個快樂的女孩，有朋友圍繞在身邊，專心學業，努力將來，成為一個出色的Childcare和一位好母親。我刷乾眼淚，深呼吸一會，離間洗手間，鼓起勇敢走進課室，去面對當天教授那使我懼怕的題目 —— 虐打及破碎家庭對兒童的影響。


          這揮之不去的陰影，就靠你不懼怕地，正面的與它對抗，必需正視它，勿再一次收藏起來，亦不用去承認自己在軟弱，因為這根本不是軟弱，當你正視它，正面的對著這傷口，流出眼淚，才叫勇敢。有時候，哭比堅忍更需要勇氣。

 

 

                                                                                                                         麗

反地心吸力 & 練習 第二天

由於之前只係踩過四次單車，年幾兩年冇接觸過，
再加上要學識睇馬路過馬路，同習慣呢度既地形同適應架單車，所以要練習呢。
澳洲既路係跟原本既地形而起，波浪咁。

星期日第一次試，以為屋前面果個Cres唔會點斜，
哇，原來全部都係斜架，就算有平路都唔係跟水平線。

我不斷拼命咁練，練左兩個幾鐘，比想象中的累好多好多，難好多，
完全唔係踩大尾篤、吐露港同城門河果回事，香港既路真係炸得好平滑呢。
不過正正因為咁，我好唔甘心，決定要踩好佢。
大佬，我唔係買番黎玩同散步架，有重任在身架。
「我一定要成功慳每月$80AUD既車費！」





今日星期二，唔洗番學再練 ~
今次決定先踩去學校一次，再由學校去Glen，再番屋企。
大膽D跨一大步去挑戰，學野會學得快D。

因為呢度既單車比較高，我對腳只有腳尖掂到地，
一失平衡時想掂地就會撞到個踏板，搞到隻腳瘀左四五撻，有撻仲好西利呀。

開始熟番D既時候，已經到番學路必經既大斜坡，差唔多有40°角，
好恐怖呢 ~~~

不過你只要冷靜D，對自己有信心，同自己講定D黎，集中精神，就冇野了。

去呀 ~~ 唔洗驚架，你只要踩多幾次就會習慣架啦！
               好快你就會變得熟練，唔再驚架啦！

成功跨越左唔知多少個馬路同斜坡，終於到學校啦 ~
好累，但係幾開心架 ~

黎多張正面影下個車車先。

多謝肥傑今日陪我試路，我踩，佢行路同拎野
每隔一陣之後就大家交換，等佢唔洗得個行字咁累 ~
跟住之後我地踩去Glen，極口渴，去Gloria Jeans度嘆左杯好香好香既Iced Coffee
一如以往地，一杯兩份飲，冇咁貴，又可以嘆即磨咖啡 ~

係商場行左兩個鐘之後，去超市買左一大袋野，肥傑辛苦了，
一路搬一路搬，我點會咁忍心丫，中間留左一大條平路比佢踩，
當我好累咁抬住袋野去前面會合佢時，佢講左一聲：好爽呀！

今晚大家都好累好累，琴日一整日冇食過肉到肚，今晚煮左餐好既 ~
有沙嗲雞啦，韓燒豬同埋豆豉鯪魚炒南瓜，雖然全部既份量好細，
不過大家都食得非常滿足呢 ~~

經過今日呢練習，進步左唔少呢，我有信心聽日踩番學！
(雖然都仲係驚驚地…)

不過我一定唔會怕辛苦！



                                                                                                                       麗

香噴噴、脆卜卜的。蔥油餅

買左一大棵蔥番黎用唔晒，加上買錯左一大包面粉番黎，點算好呢 ~
呢個時候我諗番起細個時，大概七歲左右，同媽一齊整過既蔥油餅。

到依加我仲好記得當時既感覺，同步驟，
好記得點樣將個面粉團一扭，再用木棍壓平，就會成為幾層既蔥油餅。

唔需要食譜，就已經可以整呢個餅，好香口吸引呢 ~

                                                                                                                        麗

拎單車

 

食完好甜既Donut之後，就去BigW度拎單車lu ~

扮睇。

傑：喂，新黎左架粉紅色喎
麗：咦！係喎！
傑：不過紫色靚D ~

又扮演番當日試頭盔 ~

我想買紫色架，不過單車又紫色，頭盔又紫色會太俗。

呢度D野好齊架 ~

玩完一輪就去拎單車了。

當我架單車被慢慢地推到身邊，個感覺真係好開心呀 ~

由推出去商場到搵升降機果段路，
我都好小朋友咁一路笑唔埋口，又怕醜又尷尬咁。
仲唔敢自己推，要肥傑推 ...  

唔知點解見到架車好閃令令，好似識發光咁呀 ~

 

 

                                                                                                                     麗