30/1 - 24/2 這段期間，我們暫住在朋友的朋友家。
直到24號才搬到現在住的地方。
當時的我寫了以下一段感受：
用了一個月時間不斷到處搵屋，經過千辛萬苦，有血有汗，終於搵到屋啦
搵屋、搬屋、執野，外國地大路遠，對於冇車既我地，呢段日子真係好累好辛苦。
除左一個中型大貨櫃既野要搬要執外，所有家私要砌過，
仲要頻頻撲撲周圍搵平既家私，到你好辛苦咁買到，更要抬番去新屋，
半個鐘既腳程，日曬雨淋，每天又要上學，不容易吧。
真的，真的這樣，捱了一個月。
萬事起頭難，抬著書架那一天，積累了一個月身心的疲累，大家都差不多到極限，
在那條我們漸漸熟悉的小徑上，我們對著自己大聲說：
「一定要好好記住這一段日子，將來有了車子，富裕了，
也不能忘記我們是如何捱過來！」
呢D說話絕對唔係我地唔捱得，只係我地有更遠大既目標。
與Sammy的緣份 和 點解會搵到呢間屋？
話說番當時我上語言班，結識左一位韓國朋友Sammy，同佢幾投緣，
可惜佢只係讀兩個禮拜就冇讀。
後黎有好幾次係City同Train Station都撞到佢，有次晚上11點我同傑為左慳錢，
冇入到車票坐霸王火車，係落左車既Sammy發現有人上車Check票，
飛快地跑番黎叫我地落車走，電光火石之間，我地剛跑出車，車門已經關左，
而車入面果兩個職員笑笑口咁望住我地，架火車就咁開走左lu ~
多得Sammy，如果唔係我地要一共比人罰$300AUD！
仲記得當時我一落車後大叫一聲Oh My God！捉住Sammy對手叫：It's so exciting！
旁邊即刻響起笑聲，原來係有三個同路人！佢地三個都係印度人，
下一班車係半個鐘之後，於是我地好開心咁傾計，仲教我地點樣坐霸王車。
因為佢地好窮要慳錢慳生活費，所以每次都唔入票，比人捉過幾次，經驗老到。
不過經過果次之後我真係好驚好驚 (連Sammy同印度人都笑我驚青)，
每次都買全價票同入票。因為呢個係我地應付既責任黎的。
( 之後肥傑有次又唔入票，果次係我靠精明既頭腦同演技，係三四個眼利既職員面前救番佢，
我真係鬧左佢好多次，好驚架，成日都係咁！佢之前果兩年又係咁做開喎。
即使佢依加每次番學都冇入車票 =o= 佢話電車搭幾個站冇人check )
後黎啦，我同Sammy係Msn傾計，發現佢岩岩搬去既新屋仍有空房，
於是我地第二日就迅速睇屋睇房，當晚同屋主商討好價錢，翌日扑槌。
(間屋係屋主租黎再出租比人，唔係自購，係唔合規矩的)
$800 AUD per Month 包水電煤上網。
由於過多幾日再搵唔到屋，我地就要搬去Thomas度暫訓廳
又一次緊急關頭之中，Sammy幫左我地。
24/2 我地搬屋了。
我地住果間其實叫唔上做「房」，因為成間屋係有一part係打斜，斜落去後花園
有少少似地牢咁，由原地行樓梯落去，房不成房廳不成廳的一個空間，沒有門。
當時我實在太疲倦，雖然有窗，但係我怕向下行既感覺，但係好難再搵屋，
放是交由傑決策，點知佢又十分滿意呢個「空間」，我當時就相信住傑既決定。
我地間「房」，下一篇再介紹。
就係咁，我地就同左一班韓國人住啦 (至今當中有好多生活經歷容後分享)。
依加先分享一下我地間屋同附近環境啦。
廚房
廚房後面行落去就係大花(糞)園
呢個窗仔後期貼滿左我要嘗試既食譜
飯廳
客廳
屋主既52寸電視
走廊
上圖既右手面就係下圖所見既門口
睇下屋企附近先 ~
屋既外貌 ~
每日行既路 ~
經過既樹藤屋 ~
行落去Syndal Station既路 ~
見到Train Station個牌啦 ~
肥傑入票啦 !
我地就係成日係呢度等車 ~
麗
聽到好開心，可以同朋友出去聚一聚，傾傾計。
