Daphne's Life: Puffing Billy & Warrook cattle farm (with Videos)

非常非常開心，富足既一日~
坐古舊既蒸氣火車穿越森林、去大牧場擠牛奶、餵牛仔飲奶、
睇剪羊毛、食牧場午餐等等，呢D都係之前想做而未做的；
陽光之下餵袋鼠、晴天下探訪Phillip island、靚到暈既海灘，
圓左好多以為要再等下次既夢 ~

今日參加左Day Tour ~ 陽光萬里 ~
因為另一邊果團友飛機delay，所以先車我地上山，司機帶我地去睇雀。

果度有好多鸚鵡呀，立即去買糧餵佢地，
點知佢地饑餓得如狼似虎，咬我隻腳趾公，
鸚鵡個嘴係一個大勾，所以流左唔少血，腫成紫色一舊，十趾痛歸心。
結果全日跛住咁行，手手腳腳加埋既抓痕超過二十條，
不過佢地唔係有心攻擊 ~

餵鸚鵡真係要小心呀 ~ 始終佢地個嘴真係可以啄死人！

第一站係去坐蒸氣火車 Puffing Billy。
呢度既景色真係非常之靚 ~ 每一棵樹都高嵩入雲，
十足十細個睇紀錄片入面既熱帶雨林咁 ~

車頭浩蕩咁響起一聲「呠~~~！」蒸氣峰煙即起 ~火車開動啦！
感覺真係好奇妙，景物緩慢地向後移動，離車站愈黎愈遠，慢慢走入森林之中 ~

我地不斷對住窗外既車長揮手say Goodbye！更有車長與車上乘客逐個逐個擊掌 ~
途中路過既小朋友會停下來跟我們微笑揮手 ~
沿塗既景色一流 ~ 半個小時既車程眨下眼就過了 ~

大部份乘客都係好似以前既人一樣坐係窗邊 ~ 將雙腳伸出去 ~
呢種經驗真係好難忘，好令人愉快 ~

好有型既車頭呀 ~
導遊好好人，知道我地興奮不已，等到我地影夠相先催我地上車 ~

上車之後就大約1個鐘車程，去牧場度午餐、擠牛奶同睇剪羊毛 ~
車上既風景好靚，牧場、原野草地一望無際 ~
全部程都冇休息過，就咁睇風景已經好夠 ~

跟住一到步我地就食地道既牧場午餐 ~
出乎意料地好呀 ~ 估唔到會有紅白酒提供 ~

原來呢間野連住旁邊既一間過百年歷史既住宅 ~

跟住我地坐牧場卡車去牛欄 ~

聽牧場入面既一個Cow Girl介紹，然後一人拎一支大奶樽去錫牛仔飲奶 ~
一個月大已經好大隻，好大力！
我第一個去餵，一噴就噴就佢一面奶，跟住佢唔彩我，飲第二個人個支。
哈哈哈哈！我講個秘密你知，其實我係Child Care Centre實習時，
第一次餵幾個月大既BB都試過噴到佢一面都係。

然後就係擠牛奶！肥傑佢四個奶奶都擠過！

我擠左一個咋，因為我一埋去佢就唔耐煩，係度郁隻腳 ~
好得意呀個感覺 ~ 擠完之後我地即場試下新鮮既牛奶，唔錯唔錯 ~
好新鮮好好味 ~ 岩晒鐘意飲奶既我 ~

之後去羊欄呢度睇兩隻工作犬點樣趕羊 ~
呢兩隻狗係父子黎，老豆叫Tomo，仔仔叫做Bruce ~
兩個超級幫得手，非常聽指令，佢介紹話一隻工作犬可以代替10個男人 ~
我今日親身咁明白咩叫做「羊群效應」，每一隻都跟到實一實，
你走我又走，個樣又木獨又驚青又冇主見，係咪好似社會上某一種人呢？

原本段片有兩個韓國女仔係前面唔係不停講野，仲睇到「呻吟」，
唔係我核突，係真係一見到D羊跑，就叫到同「呻吟」冇咩分別，
我番到屋企睇片都呆晒，所以轉左背景音樂好D ~

天氣既雲彩 ~

再然後就去睇剪羊毛，隻羊仔郁都唔敢郁，舉手投降咁 ~
好搞笑 ~

好驚險呀，剃咕咕 ~

呢個鬼佬好奇怪，一直望住我地呢個方向，臨走時同肥傑講左句野，
不過肥傑冇諗過佢會突然之間講野，所有聽唔清楚，不過就聽得好清楚係
「Fireworks on New Year's Eve」，唔通佢見到我果晚喊！
希望係咁岩得咁橋撞到，我驚係比電視影左，咁就真係樣衰一年…

肥傑玩皮鞭個樣變狠！笑死我 ~
平時睇Street performance比人嚇得多，所以非常之雀躍想試下！
不過好難玩呀，果個鬼佬每一下都響到方圓十里都聽到！