肥傑番工‧肥傑放工

我同肥傑都各番左一個月工了，巧合地一齊搵到工，一齊開工。
大家都係係一間「大機構」裡面做，哈哈哈哈！
我"mount"個車邊都算係既，大眾書局，你話大唔大！
我果份係Part Time，暫時半工讀賺錢買下花戴，所以講出黎唔緊要 ~
而肥傑果間係有獅子既(有獅子既公司都有幾間架，唔好一諗到係邊間就覺得係邊間呀！)，
跟住其它既我都唔講啦 ~~~

讀書、畢業、工作 …
一個人、一個人生轉變得最大既其中一個因素，就係工作。
我相信我地正經歷緊呢個轉變，踏入緊人生既另一個階段。
一對可以走到去呢一度，感覺真係好奇妙 ~
將來要同你走下去，走過每一個唔同既階段，經歷每一段轉變。

呢首歌既意義非淺，每次感覺深刻，一世都岩聽 ~

「幸福在坦率中進化　淚水用體諒練成茶
隨年華同步挽手跨堤壩
未靠鮮花萬打　裝飾這頭家
日見夜見不減牽掛　全為在乎大家
刺激歲月始終需要昇華
長途伴侶　行到這裡甚麼都不怕 」





Career展開之後，
可能生活會更好，可能可以做既野會變得更多，
可能離每一個夢想會更踏前一步，
亦可能青春無畏既時光會慢慢遠去，影相再做唔出呢D動作…

我諗，我大概知道將會係一件點樣既事。
我只希望，我地可以保存住一顆青春不老既心，
想做乜就去做，信自己，繼續隨心所欲。

 

等肥傑放左工之後，湊巧經過一間新開既拉面店 ~ 叫築地拉面 ~

奉上兩杯冰玄米茶 ~

比起最近食過既數間拉面店，呢間都算唔錯 ~

隻蛋真係好味到暈 ~

It Ta Ta Ki Mas ~

 

食完拉面之後又去糖百府食雪花冰 ~

好鐘意佢一層層分開既感覺 ~

跟住去影貼紙相！
其實我地係第一次兩個人影 ~ 之前果次係同涓涓同家敏。

祝你大展鴻圖！D錢好似呢張相咁圍住我地~

呢張好過癮呀 ~ 兩個公仔都咁岩位既 ~

有個制可以加大隻眼，問你死未 ~

最鐘意就係呢張！

 

無論咩時刻都好，我相信美好既人生必定會係前面。

 

                                                                                                                   麗

金山郊野公園 (with video)

今朝起身見天氣唔錯 ~ 即興叫醒阿爸，去行山。
今次出門比較晚，不過時間都好充足。
其實個幾兩個鐘就夠行 ~


有成十幾年冇去過金山啦，好耐冇見過「係路邊既馬騮」~
D馬騮都幾惡呀，一見人就依起排牙兇你！
初時都幾驚，不過見得多就冇野 ~

呢條河好靚好清 ~ 唔怪得馬駿仔揀係呢度住啦 ~

 

好得意既 大 中 細 ~

可能係岩岩回暖，好多馬騮當眾交配 ~
連小馬騮都唔錯過呢個季節，真係令我大開眼界 ~

呢張好得意 ~

家敏既驚驚樣 ~

我地行落去條河度。

肥傑發現左勁多蝌蚪呀 ~

比我捉到一條上黎 ~ 原來好易捉 ~
佢不停啜我隻手，好痕 ~ 其實捉佢上黎唔係咁岩既，不過我又好有好奇心，
因為咁大個女真係好少接觸呢D野，之後緊係放番佢入水度。

晴天PigPig

扮馬騮 ~

又黎！
馬騮：「哇，呢度風景真係一流 ~」

晚上Book左一間泰國餐廳，一家人食飯 ~
其實係替我預祝生日既 ~ ^^

呢餐食得唔錯 ~ 無論氣氛同食物 ~ 大家都好滿足 ~

希望每年簡簡單單，同平常一樣就夠 ~

 

                                                                                                                                          麗

 

Lamma Island

天氣好靚呀 ~~~~
咋咋臨搭船出去南丫島郊遊。

呢度既氣息同市區既好唔同，上次黎已經係十年前既事。

Lamma Island係一個好多外國人住既島，餐廳或者路邊賣既雜志都係外國雜志，
島上面有唔少酒吧同精品店，住係度都好似幾寫意咁bor。

好喜歡呢一種既屋仔 ~

又一次悠悠閑閑咁行山郊遊 ~

對身體好呀 ~

我好鐘意依加呢隻頭髮既顏色呀 ~ 肥傑幫我染架 ~
我個頭真係無敵難上色，足足染左個半鐘再用風筒吹十分鐘，真夠變態。
係呀！新髮形都係佢幫我剪 ~ 好幾年都係咁lu ~ 因為我好恐懼出面剪頭髮。

我地搵緊路去風車果度，原來比眼見既遠好多，
中途食左碗唔好味既豆腐花，好彩穩陣叫一碗。

覺得好爽快呀 ~
肥傑呢頭先話完我個表情曳，呢頭佢自己又咁放蕩 ~

終於到啦 ~

好靚呀 ~ 如果可以有好多風車就好啦 ~

落山後遇到一間泰國人開既小食店，非常之有特色 ~
而且幾好味 ~ 有少少好似去左泰國咁 ~

離島特產 -> 特大魚蛋 ~

番番去碼頭等船 ~

其實長洲好玩D ~ 因為多好多野食 ~

好耐冇拍過自拍，o靚妹下先 ~

 

 

                                                                                                                       麗

廣州探公公

 

因為某一D我都唔明既原因之下，呢日好倉促咁同主管請假，
番廣州探多年冇見既公公。

公公長居於湖北，今年86歲，自己一個背住一個大背囊黎廣州。
其實我真係唔明點解阿媽唔會主動去湖北探佢，要佢黎到廣州先去一去，
甚至行路、過馬路都完全唔睇下公公一眼，
舅父就更過份，我地一到步就見到佢好兇惡咁喝公公，睇到我個心好唔舒服，
或者佢地既過去我一D都唔了解，不過無論係點都好，我一定唔會好似佢咁。
就好似將來我會點樣對待自己母親，就係「不計過去」。

家敏、肥傑同我都非常驚喜86歲既公公身體如此地健康，真係好開心。
就等我講下公公點樣利害法！
無乜病痛啦 ~ 可以自己行3層樓既樓梯 (我都唔明點解佢地連揀餐廳都完全唔考慮老人家) ~ 聽得講得，仲會有氣有力咁講一句半句既粗口 ~ 好有精力打牌 ~ 唔洗戴眼鏡，眼晴冇退化 ~ 非常整齊，全身既衫褲都燙到起骨，皮鞋唔著既話會好整整放埋一邊 ~ 笑埋上黎既時候好似一個BB，眼神充滿住慈祥 ~ 健康既白髮上居然還可以清晰見到淡淡既黑色 ~
 
公公既身體狀況好令人開心，但更令我怕見到往後漸漸退化既佢。
我其實好明白人生必經既那個階段其實可以睇得好豁達，
但始終都唔想亦唔忍心見到，希望果一日永遠都唔會黎。
回憶起細個時70零歲係廚房精力充沛咁煮飯既公公，依加望見動作緩慢的背影，
心裡面頓時長滿了好多複雜的感覺，有一種深深既體會…

就係果一刻，我諗起龍應台的《目送》，書裡面話「我慢慢地、慢慢地瞭解到，所謂父女母子一場，只不過意味著，你和他的緣分就是今生今世不斷地目送他的背影漸行漸遠。你站立在小路的這一端，看著他逐漸消失在小路轉彎的地方，而且，他用背影默默告訴你：不必追。」

還年輕、未見盡人生百態既我，當初閱覽到呢一段既時候，並無甚麼刻骨銘心既感覺。今日，我第一次深深感受到，呢一種難以形容又捉不住的惋惜感。我始終認為未去到人生某一個階段，係未能真正感受到呢本書既意義。我相信作者既感受一定比我深上百倍。

短短的兩天，公公只走在「身壯力健」既人背後，
我實在做唔出用背影向住佢呢個行為，只敢一直一直走在公公既背後，
默默地看顧住佢，看著佢既背。

畢竟86歲了，行動緩慢了，大陸過馬路真係好危險，平時散步完全冇人陪佢，
咁大年紀仲要湖北廣州兩邊走，湖北過冬真係好凍，暴雪橫飛，
一個老人家係鄉下地方，我實在好擔心佢生活上既照顧 …
我知道自己冇資格咁講，不過由細睇到大，
姨媽舅父自己阿媽果D真係比唔到一種孝順既感覺我，
我好討厭見到值得受人敬重既老人家比人呼喝，
因為比著我一定唔會咁，過去係點都好，事情一件還一件。


含蓄既我臨別上車時同公公匆匆講左句「你要保重，有時間我們一定會來看你」，(此時舅母用手推正在跟公公揮手道別既我、家敏及肥傑上車，說「哎呀，還揮甚麼手呀，快點上車」)，其實呢句說話入面真係帶有好多好多意思，絕對唔係隨口講，希望公公會明白到。

短短既廣州之行，我地三個年輕既都出一出左去行下。
就係北京街了。 

因為交易會既關係，所有的士同電單車都唔載人，
好彩遇上呢個好人既司機，於是我地三個坐左一程非常難忘既涼爽摩托之旅 ~

最後要記載既就係，早前放左呢一張相上facebook，玩左一個AB選擇題。

A. 有左3個月
B. 有入冇出

。

 

。

 

。

 

一時既貪玩，點知換黎既係大部人都以為我懷孕呀！
原本一D都唔介意比人話肥既我發覺，原來「一個人肥到比人認為係大肚」係比起就咁「比人直接話肥」係會唔開心好多架！

直到有人send SMS比肥傑恭喜佢，Thomas係msn向肥傑查問，
我就覺得事態嚴重，流言蜚語，一陣傳到去親戚就水洗都唔清。
所以就再影多以下呢一張相，有兩個「大肚婆」~

另外我一開始呃阿媽，佢真係信左，佢話根本就係四五個月，
仲話我地要有計劃同埋經濟能力，當時肥傑都係度，實在太好玩啦，哈哈哈哈！

話時話呀，第一張相就好明顯咁分到子宮同腸胃啦 ~
我個子宮都未隆起！屎黎架咋！

 

其實番到黎HK呢兩個半月黎既生活係咁既…

每日都2-3包薯片或姐朱古力，好多次半夜12點之後落街食雪糕同薯片，
閒時食左10幾餐麥當勞同街邊小食，番黎咁耐大部份時間都係出街食。

不過呢D都已成過去， 我已經重新做人！
   

                                                                                                                            麗

最難捨的一段感情

肥傑說：「每個人都有獨立的思想及智慧，但為何有時仍會自欺甚至受騙？是因為，這個人非常希望那件事是真實。」這些人其實明明就很清楚事實，怎麼還會甘願「愚笨」地去相信？我想大概凡人生於紅塵中，七情六慾，總會有看不透的時候吧。

 

今天我又為一件舊事情難過了，這事折騰了「愚笨的我」六年之久，多年來不乏反省，試過執著，亦試過放手。如今我抱著從容的態度，依舊真摯的奉獻全心，本應無欲無求，卻又貪婪地、慢慢地產生了渴求，渴望友情的溫暖會溫柔地降臨在我的身上，那怕只是一絲的關心。結果又回到付出有沒有收獲的問題上，在這不平衡的關系裡內心的孤獨感、寂寞感不斷地膨脹。最令人嘆息的是，「朋友」這詞在現世代上實在太廣義了，愈來愈變得「虛無飄渺」，單是我和你的定義，就可以有天淵之別。思想步伐不一樣，就不能走下去了。因此才有人說道：「人生得一知已，死而無憾。」

 

或許你會笑我傻，這麼久才想得通，而我會告訴你，當你視對方為一生朋友時，情感真的很難說得通。

 

從前共你促膝把酒傾通宵都不夠
我有痛快過你有沒有
很多東西今生只可給你
保守至到永久
別人如何明白透
實實在在踏入過我宇宙
即使相處到有過裂口
命運決定了以後再沒法聚頭
但說過去卻那樣厚

卻沒人像你讓我眼淚背著流

嚴重似情侶講分手

總好於那日我 沒有 沒有 遇過某某

 

交朋友就跟談戀愛一樣
好朋友、好知己，可遇—不—可—求。

在沒甚麼事發生下，就平靜的，最後一次終結那內心裡讓我痛苦的情感。
重新掌握「朋友」的定義。

這次打出這篇文章，顧不了別個閱後的感受了，對不起。

 

 

                                                                                                                         麗